Tag Archives: Piero Marcialis
GLI OCCHIALI di PIERO MARCIALIS
GIAN GAVINO IRDE a PIERO MARCIALIS
At a esser culpa chi t’an postu Piero
e no Pedru comente namos nois
chi mos as fattu a ischire custu sero
chi ti ‘enin a conca ahis e ohis…
E comente diat esser chi no faghet
a chistionare in sardu ‘e calchi cosa?
Mancari puru un’ispina ti punghet
no po cussu la lassas una rosa…
Si no bogas de cabu cust’allega
est mezus a no abberere buttega!
Eppuru eppuru ses de rensia bella
de sos Marcialis[1] portas sambenadu
naschidu ses a sutta ‘e bon’istella.
S’istoria antiga t’at bene fadadu
nandedi fizu ‘e fiza ‘e Summu Deu,
e sos nuraghes no bi fin ancora…
No sias tando in murrunzu e in peleu,
sas timorias chi ch’anden in bon’ora!
Ammentadi a Franziscu Innaziu Mannu…
Chie portat coro, no li ferit dannu!
(Gian Gavino Irde)
[1] Marcialis nd’ ‘essit dae s’accadicu “martu” = figlia e dau su sumericu “alu” = ariete, e postas paris custas duas peraulas heren narrere “fiza ‘e summu deu”
IS OLLIERAS de PIERO MARCIALIS
ITA CHISTIONU A FAI?
Ita chistionu a fai
si seus giai museu
prima puru di essi storia
e totu su pani de onnia dì
tenit sapori de feli ammisturau
in s’umbra de nuraxis arruinaus?
Cudda felicidadi antiga lastimada
a su tempus feniciu e cartaginesu
fiat giai colonialismu
gaunciu marigosu
chi de sempri si serra sa bucca.
Occupada sa terra e furriada
a basi militari e bassa industriali,
disterru de ominis capazis
chi ddi nant emigrazioni,
mill’annus de suggezioni
de sanguni e ciorbeddu,
francu su feli fuliau
de cussus chi ddi zerriant bandius
armas chi ferint a nosu e totu
cun fruttus de presoni e de grandu paura.
S’Italia s’at donau sa scheda po votai
cun follius de prumissas de pani e de traballu
cun risultaus de famini de pani e de cultura,
s’Europa connoscit un’isula de mari de soli e de ispassiu
milli fueddus ci sonant in s’istadi…
in s’ierru torrat su silenziu.
E in su silenziu torraus a chistionai,
e chistionu deu puru in custa lingua antiga
chi est durci e marigosa de sentidu,
ma ita chistionu a fai?
(Piero Marcialis)